transkripsyen fonetik fonologi jaku iban ba randau besari sari bansa Iban

Tanya 1 Transkripsyen leka jaku belalauka randau ti dirikod.

Jaku iya nya siti pekara ti beguna dikena kitai berkomunikasyen enggau orang bukai. Nyema kitai enda ulih bejaku, nya tau ngasuh kitai tusah deka berandau sereta bekunsi penemu enggau orang bukai. Tiap-tiap raban bansa ba menua tu endang bisi ngembuan jaku Kediri empu pia mega bansa kitai Iban. Chunto iya, ba menua Malaysia kitai mayuh ngembuan macham jaku baka jaku Melayu, jaku India, Jaku Melanau enggau jaku ti bukai. Jaku mega nunjukka identiti tauka bansa kitai. Kebuah pia laban ari jaku orang udah ulih ngelala sapa kitai enggau nama bansa kitai.

Kelimpah ari nya, jaku mega siti pekara ti bekaul bendar enggau bidang fonetik enggau fonologi. Pekara ti beguna amat dikena kitai ngasilka munyi jaku iya nya palan artikulasyen, organ artikulasyen enggau organ dalam tubuh. Enti sema bisi penimpang ba salah siti perengka artikulasyen nya tadi dia iya ulih ngujungka kitai enda ulih bejaku enggau munyi sebut ti betul tauka enggai nyadi nyebut sesebengkah leka jaku. Nitihka penemu Chemaline enggau Padang (2011), artikulasyen iya nya ngasilka munyi jaku ngena rengka artikulasyen tauka organ ti ngasilka munyi jaku.

Jaku Iban siti ari jaku ti bisi ngembuan pengelebih kediri empu. Tajapan semina siti bansa tang jaku Iban ngembuan mayuh bengkah tiun tauka munyi lebuh disadaka orang ba siti-siti menua. Taja pia, jaku standard kitai Iban endang tetap bisi dikena kitai berandau tauka ngerandau pangan diri enti nyema kitai datai ari menua ti bebida. Lebuh ti bekenaka jaku standard maya kitai berandau enggau Iban ari menua bukai, nya ulih ngasuh komunikasyen antara kitai nyadi menyana tauka menuku. Kebuah pia laban enti nyema kitai bejaku nitihka dialek ba menua diri empu, nya ulih ngasuh orang ari menua bukai tau enda mereti senentang utai ti dipadahka kitai. Kitai sama bela nemu tiap-tiap menua endang bisi terminologi kediri empu senentang siti-siti leka jaku.

Ari nya, pansik ti dipejalaika aku senetang bida jaku Iban Bintangor enggau jaku Iban standard ulih dipeda ba transkripsyen di baruh tu:

/putung/ /taɁ/ /eŋgay/ /ɲadi/ /dukuɁ/ enda/ patut/ /nuan/ naɲa/ /nama/ /utay/ /ɲamay/ /naday/ /liat/ /kulit/ /ɲo/ /ŋagay/ /sembayang/ /bisi/ /utai/ /manaeh/ /madaeh/ /ŋasuh/ /makai/ /tulaŋ/ /suba/ /jai/ /puŋgung/ /dutur/ /datai/ /udu/ /ngema/ /may/ /berat/ /mati/ /besiŋkap/ /keɲa/ /jay/ /pedis/ /bejalay/ /udaeh/ /sida/ /ya/ /empu/ /keh/ /kita/ /rumah/ /sepital/ /ambih/ /aku/ /ŋanti/ /dulu/ /nemu/ /uraeŋ/ /naday/ /bedaw/ /ŋena/ /neh/.

Tanya 2 esei - Jurai senentang bida entara sebut leka jaku nitihka pelilih menua diri empu enggau sebut jaku Iban standard.

Tiap-tiap iti pelilih menua ngembuan patah sebut leka jaku ti enda sama entak sebut iya. Kebuah pia laban penyampat enggau pengelubah leka jaku nitihka ai siti-siti menua enda sama. Nitihka Husin Fateh enggau Nazariyah (2013), jaku Iban standard iya nya jaku ti dikena mayuh agi bansa Iban di Pulau Borneo. Iya disebut nitihka sepil lalu mega dikena ba situasyen formal baka dalam pengawa pelajar, radio, bup cherita, bup injil enggau ti bukai. Lalu jaku pelilih menua tauka dialek iya nya jaku ti semina dikena orang ba sesebengkah pelilih menua aja. Jaku salah ari patah sebut tauka sepil lalu enda diterima ba pengawa formal. Nitihka Bup Sereba Reti Jaku Iban (2011), jaku Iban nadai ngembuan dialek tang mayuh varian leka jaku, baikka nya varian pelilih menua, varian sebut sekalika varian sepil.

Abdullah Hassan (2008) bisi madahka lingusitik tu iya nya bidang pansik saintifik senentang jaku. Penemu linguistik ngembuan chabang ti chukup kompleks sereta mar bendar diperatika. Ari aspek fonologi, sintaksis sereta enggau semantik, semua bidang tu megai tanggung pengawa kediri empu dikena nempa jaku ba siti-siti raban bansa. Jaku ukai semina ditulis nengah asil karang tauka litaricha aja, tang mega dikenataika nengah teknik sanggah dilah ti nyadi medium komunikasyen ti balat bendar dikena kemaya hari tu. Jaku ti dikenataika ngena kereban artikulasyen kitai mensia nya nyadi siti ari chara ti semitan bendar dikena berinteraksyen enggau orang bukai.bepun ari kelia menya. Nitihka Gumperz (dalam Abdullah Hassan, 2008), pekara ti dikenataika nengah sanggah dilah (lisan) nya kereban randau ti nyadi buah runding tauka idea sereta jurai sesebengkah situasyen tauka ulah sosial ti ditusi.

Mayuh amat pekara ke tau dipansik enti kitai deka nemu baka ni dialek nyadi dalam sesebengkah bansa jaku kitai mensia. Pansik tu mega ulih dikena nyerenih baka ni kitai bebidaka munyi entara dialek tauka sebut leka jaku nitihka pelilih menua enggau jaku Iban standard.  Ari pemayuh dialek bisi siti variasyen ke diangkat nyadi variasyen standard ti diempu semua, ngembuan pengentap lalu diterima semua orang nya nyadika kebuah iya dikumbai standard. Jaku Iban standard bebida ari dialek laban iya ngembuan pelasar dalam atur sepil, jalai jaku, sebut enggau terminologi. Jaku Iban standard dikena ba pengawa formal lalu dialek dikena ba pengawa ukai formal. Penyerekang ari segi sebut dalam variasyen standard sigi agi bisi nyadi. Taja pia standard munyi sebut nya mesti ulih diterima semua orang ba situasyen formal, dia sebut nya agi diaku sebut standard.

Lebuh beratika sebut leka jaku pelilih menua enggau sebut jaku Iban standard, jaku Iban Bintangor nadai tentu bida enggau jaku Iban standard. Jaku Iban Bintangor ngembuan mayuh sebut ti sama enggau jaku Iban standard, nya alai jaku Iban Bintangor enda tentu ulih dibidaka enggau jaku Iban standard. Taja pia, jaku Iban Bintangor bisi besibil mimit ari sebut leka jaku “udah” ti disebut “udaeh” lalu “madah” ti disebut “madaeh” enggau “manah” ti disebut “manaeh”. Pia mega, jaku Iban Bintangor mega ngembuan bida enggau jaku Iban standard ari sebut leka jaku “ambis” ti disebut “ambih” lalu “orang” ti disebut “urang”. Kebuah pia laban, dalam konteks leka jaku enggau patah sebut Iban Bintangor, semua jaku ti disebut nya sigi datai ari kaul dilah Iban Bintangor. Enti nitihka dalam randau ti dipansik aku, jaku ti dikena ba randau nya lebih agi ngagai jaku orang ti bisi pelajar sekula.

Sekeda leka jaku ti bisi bida jaku Iban Bintangor enggau jaku Iban standard  ulih dipeda ba kar perugan ba baruh tu:

Leka jaku Iban Bintangor	Leka jaku standard
/ambih/	ambis
/madaeh/	madah
/udaeh/	udah
/manaeh/	manah
/ambih/	ambih
/uraŋ/	urang

           

Ari kar perugan ba atas nya, Iban Bintangor semina ngembuan bida sebut enggau jaku Iban standard enti konsonan ‘h’ nyadika pengujung siti-siti leka jaku, kelimpah ari nya, jaku Iban Bintangor nadai bida enggau jaku Iban standard.  

Pekara tu nyadi laban dalam bidang fonetik endang bisi pekara ti ulih meri penyaru. Nitihka J. K Chambers enggau Peter (2006) fonetik pansik senentang munyi-munyi ti diasilka mensia. Nya alai bisi bida ba genap leka jaku ti disebut mensia tajapan bekenaka jaku ti sama. Bida entara jaku pelilih menua enggau jaku standard tu ukai semina nyadi ba jaku Iban aja, tang mega nyadi ba jaku bansa bukai kelebih agi jaku Melayu ti mayuh agi ngembuan dialek. Nitihka Darwis Harahap (1991) madahka dalam perkataan ada satu bunyi ditukar dengan satu bunyi lain dan ada pula yang beberapa bunyi ditukar dengan satu bunyi. Baka tu mih pekara ti nyadi ba sebut leka jaku pelilih menua Bintangor ti bebida enggau sebut standard ba leka jaku jaku ti ngembuan fonem ‘s’ enggau ‘h’ ba penuduk ujung leka jaku ti berubah nyadi munyi [h] enggau [ae].

Jaku standard tu mega jaku Iban ke udah manggai ba tikas intelektual lebuh iya dikena ngenataika penemu, mansutka buah runding enggau chara ti lojik, nunjukka tukuh regas sereta pintar, tepelajar sereta intelektual. Jaku standard tu endang jaku ke dikena ba mayuh bengkah institusyen sereta udah entap dikena napi segang pemansang kemaya hari tu seraris enggau jaku bansa bukai.

Pia mega, jaku standard tu mayuh udah dikena ba pengawa besekula sereta ba opis-opis besai, dikena bejaku, nulis surat tauka mayuh bengkah pom. Jaku nitihka pelilih menua nya seriran dikena lebuh bejaku enggau diri sebilik tauka bala diri semenua. Kebuah bakanya laban, semina sida sama sida aja nemu beratika jaku pangan diri lalu enda seriran endar jaku nya dikena lebuh ngereja pengawa ke bekaul enggau pengawa perintah.

Jaku nitihka pelilih menua nya mega ngembuan mayuh penyilap ari aspek jalai jaku, chara nyebut patah sebut, tiun tauka entak sebut ke endang jauh bida ari jaku standard. Jaku standard tu diasilka ari sempekat entara semua orang ke enda sama pelilih menua lalu udah setujuka jaku tu dikena nyadika jaku standard. Pengudah bisi jaku standard tu, nadai agi orang ulih betalatka jaku di menua diri nya mih jaku ke engkeman. Jaku nya udah dientapka nyadi siti jaku baka jaku bansa bukai.

Enggau nya mega, lebuh kitai bejaku enggau pangan diri ke enda sebaka pelilih menua, kitai tau ngena jaku standard ngambika nadai ngenataika penyarut ngagai pangan diri. Penyarut tegal tusah deka meratika jaku pangan diri sereta mar amat deka nemu nama utai ke deka dipadahka pangan diri. Nya alai, jaku standard tu mih jaku ke dikena kitai bejaku enggau pangan diri.

Kelimpah ari nya, jaku standard tu chara jaku Iban dikena lebuh mantaika leman penemu ngena lebas ti menuku. Endang enda ulih disangkal jaku Iban endang meruan lebas enggau renggat jaku lebuh iya dikena ba bidang baru iya nya baka penemu sains, ekonomi, sosial enggau politik. Nya alai lebuh ngena jaku neresa mayuh bidang penemu, maya enggau ubah ti dikedekaka ba jeman diatu enggau jeman dudi, lalu mantaika penemu enggau nadai besekat tang enda tau ngelidas ari atur jalai jaku selama ti nyadi identiti pengering jaku Iban.

Simpul Penemu

            Varian jaku pelilih menua tu ulih meri biuh ngagai pengawa pelajar. pekara nyadi lebuh sida nembiak belajarka jaku Iban standard. Nya alai, nembiak ti belajarka jaku Iban patut diterangka bida jaku Iban standard enggau varian jaku pelilih menua sida. Nambahka nya, pengawa belajarka jaku Iban standard diajar bepelasarka sistem sepil jaku Iban kemaya ari tu. Bala pengajar patut ngajar nembiak nyebut leka jaku bepelasarka sepil. Nyadika simpul, dalam jaku Iban, tiap-tiap menua ngembuan varian jaku kediri empu. Dia bisi ubah ba munyi sesebengkah fonem dalam jaku. Reti nya, sekeda leka jaku enda disebut nitihka sepil. Taja pan pia, varian jaku enda meri penanggul ngagai orang ke bejaku taja pan datai ari pelilih menua ke bebida. Kebuah pia, varian jaku enda ngubah reti sesebengkah jaku lalu nengah varian jaku tu mih siti jaku ti standard ditempa.

Kereban Sanding

Husin Fateh Din dan Nazariyah Sani. (2013). Bahasa Melayu Konstekstual.

 Kuala Lumpur : Penerbitan Multimedia Sdn. Bhd

Chemaline Anak Usop enggau Padang Anak Luna  (2011). Fonologi Jaku Iban.

Tanjong Malim. Emeritus Publications

Janang Ensiring, Jantan Umbat enggau Robert Menua Saleh (2011)

Bup Sereba Reti Jaku Iban, Kuching . The Tun Jugah Foundation

J. K Chambers enggau Peter (2006) Dialektologi.

Kuala Lumpur: Dewan Bahasa dan Pustaka

Darwis Harahap (1991) Persoalan Bahasa.

Kuala Lumpur. Dewan Bahasa dan Pustaka

Abdullah Hassan (2008) Morfologi- Siri Pengajaran dan Pembelajaran Bahasa Melayu.

Kuala Lumpur. PTS Profesional Publishing Sdn. Bhd