morfologi jaku iban

Jaku pemuka

Sebengkah leka jaku nya nyadi ari siti morfem tauka lebih.Ngambika chunto leka jaku ajar, datai ari siti morfem, tang leka jaku ngajardatai ari dua morfem iya nya ng- enggau ajar. Bisi mega leka jaku ti ngundan tiga morfem, ngambika chunto be + jalai + ka; lalu bisi mega ngundan empat morfem, ngambika chunto be + se + me + kih. Nyau deka semua bansa jaku di dunya tu endang ngena chara ti baka tu dikena nempa leka jaku. Proses nempa leka jaku baka tu mega bisi nyadi ba jaku bansa bukai di dunya. Ambika chunto leka jaku unlikely “enda patut” ( jaku English), datai ari tiga morfem, iya nya: un-, like, enggau –ly sereta dalawa “dua” (jaku Tagalog) ngundan tiga morfem, iya nya da, la, enggau wa.

Morfem tau betukuh meras enggau berikat. Morfem meras nya morfem ti ulih bediri Kediri tang morfem berikat semina ulih bediri enti disukung enggau morfem bukai. Ambika chunto, leka jaku, rumah enggau jalai nya morfem meras tang penambah be- dalam leka jaku berumah enggau bejalai nya morfem berikat laban unit tu enda ulih bediri kediri enti enda besukung enggau urat jaku.

Nya ti ngepunka proses nempa leka jaku baru dalam jaku iban . Baka ti udah dipansik struktur jaku mungkur munyi sebut tauka lambang tulis ti nyadi unit jaku ti bisi ngundan reti. Tukuh jaku nya gaya unit jalai jaku, sekalika iya betukuh tunggal tauka datai ari proses meri penambah, beturuka leka jaku tauka proses jaku betandu. Beripihka jaku ngagai raban jaku nya proses nijirka leka jaku ngagai raban ti bisi leman penyemakan lalu tau dibagi nitihka fungsi dalam raban leka jaku ti sama.

Tanya 1

1.0 Tukuh Leka Jaku Iban

1.    1 Leka jaku tunggal

Semua leka jaku dalam jaku Iban ti nadai nerima penambah tauka nadai nengah proses beturu tauka betanduka leka jaku diserangkungka dalam jaku tunggal. Bisi dua bengkah jaku tunggal dalam jaku Iban iya nya jaku tunggal ti ngundan siti patah sebut enggau jaku tunggal ti ngundan dua patah sebut tauka lebih. Tajapan ketebal agi jaku tunggal nadai nerima penambah baka: tu, nyin, nya, ditu enggau din tang bisi sekeda jaku tunggal dalam jaku Iban bisi pengering ulih bekenjing lalu ngerembai nyadi jaku tumbuh.

1. 1. 1  Jaku tunggal siti patah sebut

Penyampau jaku tunggal asal ti ngundan siti patah sebut ba jaku Iban enda mayuh. Sekeda leka jaku tunggal nya datai ari jaku injau baka jaku Melayu, English enggau jaku bansa bukai. Peratika pola sakum konsonan- vokal dalam jaku tunggal di baruh tu.

Jaku tunggal siti patah sebut	Chunto
VV	Au        Ai
KV	Yu        Tu        Ju
KVK	Suh      Roh     Bah

1. 1. 2 Jaku tunggal dua patah sebut

Leka jaku dalam jaku Iban tebal agi datai ari leka jaku dua patah sebut. Sekeda pola jaku tunggal dua patah sebut nya baka ba chunto di baruh tu.

Jaku tunggal dua patah sebut	Chunto
V + KV	A          -           ku        aku      A          -           lu         alu
V + VK	Aus      aur       ais        auh      aum
KV + V	S          -           ua        sua      D         -           ua        dua      T          -           ua        tua
V + KVK	Emas      ubat    ikan      ubah         ulat
V + KV	Aku      ubi       isu        ila         ela

1. 1. 3 Jaku tunggal tiga patah sebut

Leka jaku tunggal tiga patah sebut enti dibandingka enggau leka jaku tunggal dua patah sebut endang mayuh agi. Pola tusun konsonan- vokal leka jaku ti bansa tu nabur mayuh agi. Enti diperatika leka jaku ti ngundan tiga patah sebut sekeda nya jaku injau ari jaku bansa bukai. Sekeda pola patah sebut leka jaku tiga patah sebut leka jaku tiga patah sebut nya baka ba rintai di baruh tu.

Jaku tunggal tiga patah sebut	Chunto
KV + KKV + KV	Pechaya    bechura    pechara   kenyadi
KV + KV + KVK	Seriran        Begerit      Begerut    Merusut     Beburah
KV + KV + V	Semua     Mulia        Petua       Deria      Menua      Pemai
KV + KV + KV	Lelaki       Lelabi       Leluba      Teruna   Sebana   Bebini
KV + KV + VK	Meruan    Keruan     Seruan     Beduan   Beruit   Meruik
KVK + KV + V	Mentua    Tempua    Pendua    Kenduai

1. 1. 4 Jaku tunggal empat patah sebut

Jaku tunggal ti bansa tu penyampau iya kurang agi ari jaku tunggal tiga patah sebut baka ti udah disebut di atas nya tadi. Sekeda leka jaku tu datai ari jaku injau. Peratika pola jaku nya di baruh tu.

Jaku tunggal empat patah sebut	Chunto
KVK + KV + KV + KVK	Sentimeter
V + KV + KVK + KV + KV	Universiti
VK + KKV + KV + KV	Emperaja
VK + KKV + KVK + KVK	Encherindak

Kelimpah ari leka jaku di atas jaku akronim mega masuk dalam raban jaku tunggal. Akronim nya jaku kedut ti dipenyadi ari urup pun leka jaku tauka sakum patah sebut ti keterubah ari dijir siti rambai jaku, disebut tauka ditulis nyadi siti leka jaku ti entap, menyana sereta bisi mai reti. Jaku akronim tau ditulis ngena tiga chara.

      I.        Sakum urup keterubah ari rambai jaku ti dipandakka, lalu ditulis enggau urup besai enti iya jaku nama menyana.

Jaku Nama Menyana	Chunto
SIDS	Serakup Indu Dayak Sarawak
KGA	Komiti Gerija Anglika
YTJ	Yayasan Tun Jugah
SBISA	Searakup Bansa Iban Sri Aman

    II.        Sakum urup keterubah tauka patah sebut, ditulis enggau urup mit semua- mua enti jaku nama  menyana,

Ukai Jaku Nama Menyana	Chunto
palanem	palan latih nembiak
purata	pukul rata
pulapol	pusat latihan polis
pulako	pusat latihan kokurikulum

   III.        Enti  jaku akronim nyadi ari sakum urup keterubah tauka patah sebut nya nyadi jaku nama menyana, jaku nya ditulis bepun enggau urup besai.

Jaku Nama Menyana	Chunto
Bernama	Berita Nasional Malaysia
Proton	Perusahaan Otomobil Nasional
Mara	Majlis Amanah Rakyat

Ari chunto ti udah dipadahka, terang bendar chara nempa jaku akronim nya siti proses ngedut lalu besakumka leka jaku tauka patah sebut.

1. 3. 1 Tukuh ti udah entap

Bisi sekeda tukuh jaku turu ti udah dikena enggau entap lalu nyadi leka jaku ti meruan sereta tegap, taja pan leka jaku nya endang nyata bendar datai ari dua urat jaku.

            antarabansa                bumiputera

            matahari                      biaubalai

1. 3. 2 Betanduka jaku turu

betanduka jaku turu tau diaduka ngena chara betanduka ;eman keterubah aja. chunto :

Betanduka jaku turu

Kereban- kereban tulis balai- balai raya patah- patah sebut Menteri- Menteri Besai Kepala- Kepala Pengajar Sapit- Sapit Menteri Penulung – Penulung Kanan Mandal- Mandal Chanselor

1. 3. 3 Meri jaku penambah ngagai jaku turu

Jaku turu tau nerima penambah kena ngasilka jaku tumbuh. Penambah jaku turu tau nyadi ngena chara baka tu :

Jaku turu nerima penambah mua	Chunto
Lalu sepil leka jaku nya beserara	darah gatal      -     bedarah gatal nyual mata       -    bejual mata
Leka jaku keterubah ti udah nerima penambah diulang sebut. Tang diseraraka ngena tanda sekang ari leka jaku ti kedua.	tengah hari     -    setengah- tengah hari lemai kemari   -    selemai- lemai kemari
Lebuh leka jaku ti keterubah diulang sebut. Iya diseraraka ngena tanda sekang.	bisi ati            -     bisi- bisi ati rangkai jaku   -    rangkai- rangkai jaku
Lebuh jaku turu keterubah nerima penambah bekepit. sepil iya meruan beserara	nyual mata       -    bejualka mata mipis pending   -    ngemipiska pending

1. 4 Tukuh Jaku Betandu

Proses betanduka leka jaku dalam jaku Iban nya proses betanduka urat leka jaku. dalam proses tu, urat leka jaku tau betandu penuh, betandu setengah tauka betandu sebagi ba patah sebut dulu tauka dudi. enggau betandu urat leka jaku lalu sekeda besukung enggau penambah tauka nadai bepenambah. Bisi empat bengkah tukuh jaku  betandu, iya nya :

1. 4. 1 Jaku betandu patah sebut dulu

Jaku betandu patah sebut dulu nya tukuh ti batandu ba patah sebut dulu kelebih agi ba tukuh jaku adjektif. Chunto :

            besai- besai     -           bebesai

            dugau  - dugau            -           dedugau

            liga- liga                       -           leliga

1. 4. 2 Jaku betandu penuh

Jaku betandu penuh nya tukuh leka jaku ti dikena beulang- ulang. Sepil leka jaku ti dikena betandu enggau sebaka.

Chunto :

            bagas              -           bagas - bagas

            degi- degi        -           degi - degi

            puas                -           puas- puas

1. 4. 3 Jaku betandu urat jaku

Jaku betandu urat jaku nya tukuh leka jaku ti ditandu ba urat leka jaku. Bisi dua pola jaku betandu urat leka jaku ba chunto dibaruh tu :

Pola jaku betandu urat jaku betukuh jaku pengawa	Pola jaku betandu urat jaku betukuh jaku adjektif
sipak    -    besipak- sipak	manah      -    manah- semanah
garu      -    begaru- garu	siru           -    siru- sesiru
jimat     -    bejimat- jimat	nelap        -    nelap- senelap
lubah    -    belubah- lubah	mar           -    mar- semar

1. 4. 4 Jaku betandu patah sebut dudi

Jaku betandu patah sebut dudi nya tukuh jaku ti betandu ba patah sebut dudi leka jaku tebal agi betukuh jaku adjektif.

Chunto :

                        berani              -           berani- rani

                        pengeran         -           pengeran- ngeran

                        pemerinsa       -           pemerinsa- rinsa

                        pemanah         -           pemanah- manah

                        belanda           -           belanda- landa

2. 0 Kelas Leka Jaku

Leka jaku dalam siti - siti bansa jaku tau diripih ngagai raban jaku ti bebatang nitihka mayuh bengkah kriteria. Ambika chunto, kriteria struktur fonologi tauka munyi, kriteria struktur mirfem, kriteria struktur sintaksis, enggau kriteria semantik tau dikena beripihka leka jaku ngagai raban jaku.

2. 1 Kelas Leka Jaku Nama

2. 1. 1 Jaku nama menyana

Jaku nama menyana nya jaku nama ti dikena nyebut nama menyana lalu sepil iya bepunka urup besai. Jaku nama menyana tau dibagi ngagai dua raban, jaku nama idup enggau jaku nama menyana ukai idup, bisi dua bagi, jaku nama idup mensia enggau jaku nama menyana idup ukai mensia.

Jaku nama menyana idup		Jaku nama menyana idup ukai mensia
Mensia	Ukai mensia
Esther Raja Azri Marie	Sengkalan (ukui) Biring Menaning ( manuk sabung) Vanda Diana (orkid)	Polis Diraja Malaysia Planet Pluto Bukit Sadok Proton Wira

2. 1. 2 Jaku nama rama

Jaku nama rama nya leka jaku ti dikena nyebut nama utai tauka pekara rama ti bisi ngembuan gaya tu betukuh rama. Jaku nama rama tau dibagi ngagai dua bengkah, iya nya jaku nama rama abstark enggau jaku nama konkrit.

Jaku nama rama abstrak	Jaku nama rama konkrit
roh semengat meredeka benda tunggu demokrasi	lempuang rumah pengajar jelatung ambai

2. 1. 3 Jaku ganti nama

Jaku ganti nama tau dibagi ngagai dua sub-raban mit, iya nya jaku ganti nama tunjuk enggau jaku ganti nama orang.

Jaku ganti nama tunjuk	Jaku ganti nama diri
	Jaku ganti nama diri tanya	Jaku ganti nama diri orang
Tu kena nunjuk ngagai orang ti datai tegu tauka pekara ti benung disebut	Sapa ti dikena nanyaka bagi orang	Jaku ganti nama diri orang kesatu dikena nganti nama orang ti bejaku. aku, kami, kitai
Nya kena nunjuka ngagai utai ti semak tang enda ulih ditegu tauka pekara ti bisi kaul enggau pekara ti benung disebut	Nama ti dikena nanyaka nama utai tauka nama utai pekara	Jaku ganti nama diri orang kedua dikena nganti nama orang enggau berandau. nuan, seduai, kita
Nyin kena nunjuk ngagai utai ti jauh tauka pekara ti nyata bendar beseraka	Ni dikena nanyaka bagi orang tauka bansa utai	Jaku ganti nama diri orang ketiga dikena nganti nama orang ti dikenang tauka disebut lebuh dua iku orang berandau.
		Jaku ganti nama diri orang ti beempu dikena nganti nama orang ti empu utai. engkitai, kendua, kenduai, enggiya

2. 2 Kelas leka jaku pengawa

2. 2. 1 Jaku pengawa ukai transitif

Jaku pengawa ukai transitif nya jaku pengawa ti nadai begunaka penyambut tauka objek entudika iya. Taja pan, bisi sekeda jaku pengawa ukai transitif mesti dientudika penembu , tang sekeda agi enda begunaka penembu..

Jaku pengawa ukai transitif nadai bepenembu	Jaku pengawa ukai transitif bepenembu
dani tumbang pulai nyabak	belinsur gerai meruan sayau beratapka biru besenyataka ilang

2. 2. 2 Jaku pengawa transitif

Jaku pengawa transitif nya jaku pengawa ti nerima penyambut entudika iya, ti disebut objek. Jaku pengawa transitif mega tau dibagi ngagai dua raban, iya nya jaku pengawa transitif aktif enggau jaku pengawa transitif pasif. Jaku pengawa transitif aktif nya jaku pengawa ti nerima penambah mua baka tu;; ng-, be-, m-, ny-, n-, enggau -ka. Jaku pengawa transitif pasif nya jaku pengawa asil ari proses transformasyen tauka ubah ayat aktif nyadi ayat pasif.

Jaku pengawa (transitif aktif)	Jaku pengawa (transitif pasif)
ngemas berandauka meli nyait	dikemas dikerandauka dibeli dijait

2. 3 Kelas leka jaku adjektif

Jaku adjektif nya mungkur sekeda jaku ti tau nyadi leman teras dalam pasuk frasa adjektif. Kelas leka jaku adjektif nadai subraban ti nyengala. Taja pia, jaku adjektif tau dibagi ngagai pengabis kurang semilan raban nithka reti leka jaku ti disebut jaku adjektif.

Jaku adjektif gaya	manah, jai, regas, pandai, lembuit, kasar
Jaku adjektif chura	burak, chelum, mirah, banda, gadung
Jaku adjektif sukat/ takar	panjai, pandak, renjan, landai, tebal,
Jaku adjektif tukuh	segala, benjung, chapir, gendung
Jaku adjektif rawang	nyamai, bajik, rengut, alus, taing- taing
Jaku adjektif maya	tekalanya, lubah laun, jampat tumu
Jaku adjektif chara	jampat laju, deras, laun, begadai, betagai
Jaku adjektif geragayak ati	beraie, benchi, lelengau, sayau, rindu
Jaku adjektif seraka	jauh, semak, ampir, besendi, ngejang

2. 4 Kelas jaku tugas

Raban jaku tugas nya raban jaku ti betukuh mayuh bengkah tauka disebut heretirogen, ngembuan tukuh ti sama. Iya enda ulih bediri nyadi leman teras ngagai frasa endosentrik: frasa nama, frasa pengawa enggau frasa adjektif.

Frasa Adjektif
Jaku penguat	Jaku adjektif
amat chukup sigi kurang	manah peniggi mentas manis

Jaku tugas masuk ke dalam ayat, klausa, tauka frasa kena nanggam lalu ngenegapka sesebengkah tugas sintaksis ti nyata, sekalika nyadi penyambung, penerang, penguat, enggau mayuh tugas bukai.

Tanya 2

2.0 Pansik tukuh jaku iban enggau kelas jaku iban ke bisi dalam teks ti dipilih

2.1 Tukuh jaku tunggal

2.1.1  jaku tunggal siti patah sebut

Chunto:

Jaku tunggal siti patah sebut	Chunto
KV	Ti        Tu Ba
KVK	Mit Tan

2. 1. 2 Jaku tunggal dua patah sebut

Jaku tunggal dua patah sebut	Chunto
V + KV	I          -           li      Ili A         -           gi         agi
V + KVK	Akal      amat      atur       ulah       adat
KV + VK	Kaul      buah
KV + KV	Bisi         seni          reti         maju         jaku
KV + KVK	Rumah               raban             megai             malin
KV + VV	Tuai                 diau

2. 1. 3 Jaku tunggal tiga patah sebut

Jaku tunggal tiga patah sebut	Chunto
KV + KV + KV	Sereta     budaya     terima       penemu
KV + KV + KVK	Pengidup           pengarap
KV + KV + V	Kelia                  semua
KVK + KV + V	Mensia               panjai

2.2 tukuh jaku betandu

2.2.1 jaku betandu patah sebut dulu

Sebengkah-sebengkah – sesebengkah

2.2.2 jaku betandu penuh

Tiap –              tiap-tiap

Sapa -             sapa-sapa  

Pekara -          pekara-pekara

2.3  Kelas leka jaku

Kelas jaku nama

2. 3. 1 Jaku nama menyana

Jaku nama menyana idup mensia	Jaku nama menyana idup ukai mensia
Taylor Koentjaraningrat	Sarawak

2. 3. 2 Jaku ganti nama

Jaku ganti nama tunjuk	Jaku ganti nama diri
	Jaku ganti nama diri tanya	Jaku ganti nama diri orang
Tu	Sapa ti dikena nanyaka bagi orang	Jaku ganti nama diri orang kesatu. aku, kami, kitai
Nya	Nama	Jaku ganti nama diri orang kedua sida

2. 4 Kelas leka jaku pengawa

2. 4. 1 Jaku pengawa transitif

Jaku pengawa (transitif aktif)	Jaku pengawa (transitif pasif)
serara berandauka meli	diserara dikerandauka dibeli

2. 5 Kelas leka jaku adjektif

Jaku adjektif sukat/ takar	panjai, tinggi,
Jaku adjektif rawang	Tan,
Jaku adjektif chara	jampat , laun,
Jaku adjektif seraka	jauh, semak,

2. 6 Kelas jaku tugas

Frasa Adjektif
Jaku penguat	Jaku adjektif
amat chukup	manah peniggi mentas

Tanya 3 Ngasilka jurai senentang proses nempa leka jaku baru dalam jaku iban

Nempa leka jaku baru dalam jaku Iban endang bisi mayuh macham chara tang ruat agi ngena chara ngelekatka penambah ngagai urat jaku. Leka jaku bisi nya betukuh tunggal lalu bisi leka jaku ti ditempa ari proses meri penambah, beturuka leka jaku enggau betanduka leka jaku. Jaku ti bansa tu ulih nempa leka jaku ketebal agi ari proses  ngelekatka penambah tauka besakumka morfem urat jaku enggau morfem penambah ngena chara bedijirka leka jaku dalam siti baris. Reti nya, penambah disakum enggau urat jaku. Pengawa dikena ngerembaika leka jaku dalam jaku Iban endang besibil enggau jaku bukai kelebih agi jaku ti betukuh infleksyen baka jaku English enggau jaku Arab sereta mayuh jaku ti bukai.

Kelimpah ari nya, leka jaku ulih mega ditempa ari ti betanduka urat leka jaku enggau penuh, betanduka sebagi ari patah sebut urat jaku sereta betanduka patah sebut dudi. Siti agi chara nempa leka jaku nya ari ti beturuka leka jaku, iya nya besambungka dua leka jaku tauka lebih nyadi siti leka jaku baru. Nambahka nya, rapat salin ari jaku injau tau mega dikena. Ngena chara ngedutka leka jaku lalu ngasilka jaku tunggal akronim tau mega dikena.

Keterubah tu aku deka nerangka baka ni proses jaku nama ditempa. Jaku nama bisi empat bengkah tukuh iya nya jaku nama tunggal, jaku nama tumbuh, jaku nama turu enggau jaku nama betandu. Jaku nama tunggal nya datai ari siti morfem aja lalu iya udah ulih nyadi siti leka jaku ti meruan. Jaku akronim nya siti ari jaku nama tunggal. Jaku nama akronim nya leka jaku ti ditempa ari ke besakumka bagi-bagi ti dilesit ari dijir leka jaku. Bagi-bagi nya baka urup, patah sebut, tauka bagi-bagi ari leka jaku. Jaku nama tumbuh ditempa nengah proses meri penambah, iya nya proses besakumka penambah jaku nama ngagai urat jaku nama. Bisi dua bengkah jaku penambah ti ulih besakum enggau lima bengkah urat jaku dikena nempa jaku nama tumbuh. Dua bengkah penambah nya iya nya penambah mua enggau penambah selit.

            Nangkan ke nya, jaku nama ulih ditempa nengah chara meri penambah selit. Bisi tiga tukuh penambah selit jaku nama iya nya –le-, -ga-, enggau –er-. Sibil antara tiga tukuh penambah nya ditentuka ari faktor morfologi ukai ari fonologi, iya nya sibil tukuh ti besakum enggau urat jaku ti bebida. Tukuh jaku selit tu enda produtif lalu tau dianggap siti tukuh ti meku tauka kurang potensi ngerembai. Chunto, kemayang diselitka penambah –le- nyadi kelemayang. Jaku nama turu nyadi ari proses bedijirka dua urat jaku tauka lebih ti mai reti ke meruan sereta entap. Jaku nama turu disepil beserara tang betandan nyadi siti unit. Jaku nama turu ulih nerima penambah dikena nempa jaku tumbuh. Jaku nama turu ti nerima penambah mua disepil beserara. Chunto iya, terima kasih nyadi beterima kasih.

Kelimpah ari nya, jaku nama tau ditempa ngena proses betandu kena ngangkatka mayuh macham reti. Semua jaku nama, iya nya jaku nama tunggal, jaku nama tumbuh, enggau jaku nama turu tau dipetanduka. Bisi dua bengkah jaku betandu ti ditempa ari urat leka jaku iya nya betandu penuh enggau betandu sebagi. Keterubah, jaku betandu penuh enggau urat jaku nama sereta nadai berubah tukuh. Jaku nama ti dipetanduka tau datai dalam bemacham-macham tukuh. Urat jaku ti dipetanduka tau datai ari jaku tunggal, jaku nama tumbuh enggau jaku nama turu. Chunto jaku nama tunggal ti betandu penuh iya nya, bup-bup. Nangkan ke nya betandu jaku nama tumbuh. Betandu jaku nama tumbuh tu bisi dua bagi. Keterubah nya jaku turu ti disepil beserara, lalu semina bagi ba pun jaku aja ti dipetanduka. Kedua, jaku turu ti disepil begulai ketegal ari pengentap iya udah dikena meruan disepil bejarit penuh. Chunto iya, pola jaku ditandu nyadi pola-pola jaku.

Dalam proses ti nginjau jaku ari jaku orang bukai, bisi tiga chara nginjau jaku ti nyadika pelasar lebuh ti ngaga sistem tu. Chara nya nginjau ari jaku seperugan (nusantara), nginjau ari jaku English enggau nginjau ari jaku bansa bukai (Kementerian Pelajaran Malaysia, 2007).

Jaku injau ari jaku seperugan (Nusantara), kelebih agi jaku Melayu mayuh diserapka ngagai jaku Iban. Sistem sepil tu netapka chara nginjau jaku ari jaku bansa bukai enda bepanggai penuh ba sistem sepil jaku asal ti alai nginjau tang nitihka sistem sepil jaku Iban ti nginjau jaku nya. Taja pia, bisi mega leka jaku ti diinjau nya agi mengkang sebaka. Gayajaku injau ari jaku seperugan semina bisi siti aja iya nya injau terus. Dalam proses nginjau ti baka tu, leka jaku ti diinjau, diambi sereta diterima enggau silik ari jaku asal. Reti nya iya nadai berubah ari segi sepil enggau reti taja pan disebut nitihka kaul dilah Iban. Ambika chunto baka leka jaku vokal, bebas enggau leka jaku karya.

Refleksyen

Tukuh leka jaku enggau kelas leka jaku Iban beguna bendar dikena nisih pemereti kitai lebuh proses nempa leka jaku baru ba jaku Iban, kebuah pia laban proses nempa leka jaku baru tu begunaka tukuh leka jaku ti engkeman baru ulih nempa siti-siti leka jaku ba jaku Iban.

            Kelimpah ari nya, morfologi sebengkah bansa jaku nya jalai nempa leka jaku. Bisi sekeda bansa jaku di dunya tu sebaka jalai nempa leka jaku lalu bisi mega bebida. Bisi sekeda jaku ngena chara meri penambah ngagai urat jaku lalu bisi mega ngena chara meri penambah ngagai  urat jaku lalu bisi mega ngena chara ngubah tukuh dalam leka jaku nya empu baka jaku Arab. Nyadi morfologi jaku Iban nya bidang penemu ti betungkapka strukutur tukuh enggau raban jaku. Iya siti bidang ti kompleks lalu tau dipeda nyadika jematan  ti besabungka kaul sintaksis enggau fonologi jaku.

Morfologi dikumbai  bekaul enggau pansik munyi sebut jaku laban iya ngemeranka pansik pasal gaya leka jaku ti datai ari munyi jaku sebut. Iya bekaul enggau pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku iya tau didijir nyadi frasa,klausa enggau ayat ti mai reti. Nya alai dalam tu kitai deka beratika pansik jalai jaku ti tau dikena nempa leka jaku sereta bisi mai reti ti meruan sereta menyana.

Baka ti udah disebut pansik struktur jaku mungkur munyi sebut tauka lambang tulis ti nyadi unit jaku ti bisi ngundan reti. Tukuh jaku nya gaya unit jalai jaku ,sekalika iya betukuh tunggal tauka datai ari proses meri penambah ,beturuka leka jaku tauka proses jaku betandu. Beripihka jaku ngagai raban jaku nya proses nijirka leka jaku ngagai raban ti bisi leman penyemaka lalu tau dibagi nitihka fungsi dalam raban ti bisi leman penyemaka lalu tau dibagi nitihka fungsi dalam raban leka jaku ti sama.

Nya alai kebuah , dalam proses nempa leka jaku mesti begunaka tukuh jaku enggau kelas jaku ti engkeman ngambika jaku ti ditempa enda lari ari reti iya.

Kereban sanding

Mamat unggat et.al. , (2014), Modul Sistem Jaku Iban, Sibu, Sarawak, Sibu Printing Sdn. Bhd.

Dr. Chemaline anak Osup enggau Padang Luna, (2011), Morfologi Jaku Iban, Tanjung Malim,Perak, Emeritus Publications.

Dr. Chemaline anak Osup enggau Padang Luna, (2011), Sintaksis Jaku Iban, Tanjung Malim,Perak, Emeritus Publications.

Vinson and Joanne Sutlive, (1994), Dictionary of Iban and English, Kuching, Sarawak, Tun Jugah Foundation.

Nik Safiah Karim et.al, (2013), Tatabahasa Dewan , Kuala Lumpur, Dewan Bahasa Dan Pustaka

Uchutedong.blogspot.com.my, budaya enggau pesaka raban bansa iban, 2011, diambi maya 30 Ogos 2015